Bu gün Laçın Şəhəri Günüdür

​Bu gün, avqustun 26-da Azərbaycanda Laçın Şəhəri Günü təntənəli şəkildə qeyd olunur.
​44 günlük Vətən müharibəsində böyük qələbə qazanıldı. Nəticədə, bu tarixi zəfər siyasi müstəvidə də öz təsdiqini tapdı. Ermənistan Ağdam və Kəlbəcərlə yanaşı, Laçın rayonunu da boşaltmağa məcbur oldu. İmzalanmış üçtərəfli bəyanata əsasən, Laçın rayonu 2020-ci il dekabrın 1-də Azərbaycana təhvil verildi. Lakin şəhər bir müddət Rusiya sülhməramlılarının nəzarətində qaldı.
​Bundan sonra Laçın dəhlizinə alternativ yeni yol istifadəyə verildi. Şanlı Azərbaycan Ordusu 2022-ci il avqustun 26-da Laçın şəhərinə daxil oldu. Həmçinin Zabux və Sus kəndləri də nəzarətə götürüldü. Eyni zamanda şəhərdə bayrağımız ucaldıldı.
​Xatırladaq ki, Prezident İlham Əliyev 2023-cü il 31 iyul tarixində Sərəncam imzalayıb. Bu sənədə əsasən, işğaldan azad edilmiş ərazilər üzrə şəhər günləri təsis olunub. Buna görə də hər il 26 avqust tarixi Laçın Şəhəri Günü kimi qeyd edilir.